光榮結業

自去年四月初投入服務凡十二個半月的開奶站, 今晚正式光榮結業.
當日為了方便就手, 開奶站就設在房間外面. 全盛時期, 奶站一天有六七次光顧, 消毒奶瓶要預備足六個之多 (因為烚奶器只有六格).
近來, 行行已不甚愛吃奶, 早上一枝吃得最多, 有五安吧. 下午間中心血來潮, 也頂多吃三四安. 晚上睡前也是看心情, 大小姐想吃那晚, 也許要開四五安.有時, 奶站一天只有一兩次光顧, 奶瓶一兩個就夠用,實在不應再讓它白佔地土.
於是今晚就將各職工 (冷熱水瓶, 奶粉罐, 膠匙盒, 坐奶杯, 奶瓶盒...)一一遣散. 明天起, 開奶就在廚房bench上開, 在飯廳餐桌上開.

大汗包

終於知道為甚麼行行的頭髮至今仍是又幼又疏又短: 因為創設她的那位早知道她原來是個大汗包.
才不過四月天時, 行行的頭髮就已幾乎整天都是濕透的.
之前對她的毛毛頭一直都不甚了了, 現在就懂得欣賞了:

毛毛頭, 毛毛頭, 濕了乾得快
不用紥辮不用夾
一天洗個兩三回
毛毛頭, 毛毛頭, 濕了乾得快
媽媽太忙洗不及
風吹兩下乾返晒

小猴子

行行是小猴子
媽媽是樹幹
媽媽的衣領是樹枝
讓小猴子攀扯著
搖呀搖呀搖呀搖
於是
樽領衫變成了圓領衫
圓領衫變成了低領衫
低領衫變成了低胸衫
低胸衫變成了半截裙

(幸好我沒有低胸衫, 因為我不穿半截裙!!)

健康院

今日行行去健康院打一歲針. 見到一眾小朋友, 行行興奮得不得了: 追啦, 摸啦, 嘰哩咕嚕跟人搭訕啦, 雖然屢遭冷落, 卻仍自得其樂.
打針前見姑娘, 做 "發展監察". 行行媽還未坐定, 姑娘就說: 嗱, 今日時間關係呀吓; 嗱, 快D抱佢坐好.
行行一聽呢位阿E不耐煩的聲調, 認定是在駡她, 立時放聲痛哭.

"嘩, 好怕醜喎佢! " ( 吓? 平日只有佢撩人喎, 係怕你至卦)

在行行厲聲哭號中, 姑娘拿出幾粒積木和一個杯.
"嗱, 今日要同佢玩. 抱佢埋D, 等佢玩啦" (吓? 比著你喊到咁仲有心情玩?)

"咁你响屋企比乜玩具佢玩?" (吓? 咁多樣逐樣數? "係, 數啦" 但佢多數都唔玩個喎; 佢玩果d又多數唔係玩具喎...)

"咁比車仔佢佢識唔識推?" (吓? 無人送車仔比佢喎)
"咁比呢架車佢睇佢識唔識推..." (正在失聲痛哭的行行可能連媽媽都不認得了, 仲推車?)

"佢有無講野?" (有)
"佢識講乜野單字?" (唔止單字, 講好多, 成篇SPEECH---不過我唔識聽, 又學唔返晒出來. 我講得返出來的就是: BA-BA)
"係咪乜都叫BABA?識唔識叫你?" (係, 但不同聲調的BABA點計? 佢無叫我喎, 但唔知係唔識定唔叫喎) (呀姑娘, 但係佢好EXPRESSIVE喎, 佢多數用手勢表達架, 嗱比如......)
"佢講野慢呀吓, 返去睇下呢本書跟住做啦."

姑娘在FILE上寫寫寫, 評語也許是: 好怕醜好內向見積木唔識玩見車唔識推講野慢淨係識攬住個師奶喊.

蘋果

最香的蘋果在妳臉上

最甜的蘋果在妳手裏

防漏杯

(媽媽:) 防漏杯最可愛之處, 就是真空防漏. 用了防漏杯, 懶人如行行媽就不用亦步亦趨跟在學步兒後面, 揩抺從杯中 滴 / 漏 / 濺 到地蓆上的水.

(行行:) 防漏杯最可惡之處, 就是真空防漏. 用了防漏杯, 學步兒如行行喝水時就滴滴皆辛苦. "頭岳岳" 容易頸梗背痛不用說, 一不小心失了平衡, 就會因為一啖水而人仰馬翻.