大廈電梯內按鈕旁貼了一張卡通版安全告示, 主角是麥嘜和麥太. 行行每逢搭 lib, 總要指著告示高聲叫囂: 麥嘜! 麥嘜! 行行媽想: 阿女真聰明, 咁快就認得並愛上了小肥豬嘜.
鄰座電梯內的告示主角是大雄和叮噹. 那次探朋友, 行行依然指著告示大叫: 麥嘜! 麥嘜! 行行媽話: 呢個唔係麥嘜, 係叮噹. 行行無聲抗議: 阿媽其實你明嗎? "麥嘜"= 卡通告示.
今天與行行乘另一個屋苑的電梯, 按鈕旁明明甚麼都沒有, 但一入 lib, 行行依然指著lib掣興奮大叫: 麥嘜! 麥嘜! 行行媽話: 無呀無呀! 邊樹有麥嘜呀! 咦? (懶醒地) 今次你係咪想話比阿媽知, "麥嘜" = lib 掣? 行行繼續無聲抗議: 阿媽其實你明嗎? 我係話, 點解呢樹無麥嘜架!
