行行的禱告

晚上跟行行一起禱告, 行行說:

"親愛ge天父, 唔, 小野迦奈佢好返啦, 多謝您醫好佢; 唔, 不過邱子晴仲未好返喎, 您可唔可以醫好佢呢? 同埋, 琛琛佢仲未返嚟, 唔知佢係咪病左?" (農曆新年前行行已經在為迦奈和子晴咳和傷風祈禱, 嘩又真係病左幾耐喎.)

"媽咪, 係咪我祈禱請天父幫妳唔好掛住我?" (行行媽告訴行行, 今天返工見不到她, 很掛念她.)

"天父. 求您祝福媽咪返工好開心, 有力量." (吓?? 細路女妳知唔知乜野係 "有力量"? 行行媽故意問行行 "有力量係點架?", 行行邊曲起兩臂學大力水手般展起兩隻 "老鼠仔", 邊說 "咁囉".)

"求您祝福媽咪隻腳有力量, 因為佢行好遠路喎." (剛告訴行行今天傍晚去公司新址 "睇場", 行了好多路.)

"求您祝福爸爸好開心, 有力量. 祝福Y姐姐好開心, 有力量."

"求您幫下電視機果D人啦." (???????.......!!!!!!!記起了! 前幾天電視介紹樂施會在內地山區的工作, 報導了幾個家庭的情況) "佢爸爸媽媽都無錢, 佢地無野食, 求您比野佢地食啦." (原來行行妳還記.)

"奉主耶穌基督名字, 阿們!"

(小孩子純真的禱告, 媽媽全心全意跟妳說 "阿們".)

你讀邊間學校

行行: 媽咪, 你讀邊間學校架?
行媽: 媽咪讀好多間學校喎...唔...返幼稚園果時, 就讀 "恩光幼稚園".
行行: "陰公"幼稚園? 喺邊度架? 我唔識ge? 係咪 "陰公"幼稚園呀??

(註: 行行好些音仍未發得準, 所以.......陰公!)

假如我係日本人...

這個, 謝謝阿四廣傳.

行行媽係 "猿渡幸代" Saruwatari Sachiyo (monkey on a crossing bridge) (generation of blessing)
行行係 "中島美和" Nakajima Miwa (center of the island) (beautiful harmony)

唔假要啦

媽媽: 哎吔.........(下刪三十字)
行行: 唔假要啦.

媽媽: 弊!............(下刪三十字)
行行: 唔假要ge.

媽媽: (上刪三十字).......但係....
行行: 唔假要家嘛.

這頓飯

妳佻皮在沙發扶手和靠背上行完catwalk, 被媽媽數落一番卻不肯道歉不肯認錯, 下不了台, 便開始撒賴. 媽媽於是自顧自吃飯.

妳哭, 大聲哭. 大聲投訴哭. 大聲發脾氣投訴哭. 媽媽於是繼續自顧自吃飯.

"我喊喎! 我喊喎! 我要抹眼淚喎! 我唔開心喎!"

"我知妳做錯事, 被媽媽話, 要妳道歉, 你覺得好醜, 唔想道歉, 所以唔開心."

"係!"

"咁妳喊都無用, 做錯事要道歉, 唔好再做錯, 請媽媽原諒妳, 做番好朋友, 就會開心."

"我無錯. 係媽媽做錯事, 媽媽鬧我. 媽媽做錯事."

媽媽繼續自顧自吃飯. 妳自己拿紙巾抹過眼淚, 再走過來爭辯: "媽媽錯!"

"我知妳唔開心媽媽話妳. 但媽媽點解會話妳呢?"

"因為媽媽曳, 媽媽鬧我, 媽媽曳."

"媽媽話妳不是因為媽媽曳. 剛才媽媽已經說過了. 妳可以慢慢想想." 媽媽繼續自顧自吃飯.

良久.

"Sorry媽媽." 妳站在一旁低聲說.

"妳要跟我說話嗎?"

"係, 我道歉."

"好啊! 媽媽一定要專心聽. 讓我在沙發坐定定聽妳說. 過來看著媽媽說吧." (行行妳知道媽媽等得多心急嗎??)

"Sorry媽媽, 我頭先唔應該爬上沙發站在這裏, 好危險, 我以後唔會爬上沙發站在這裏."

"妳知道頭先做錯事媽媽好開心呢! 因為站在這裏好危險, 會跌下來, 妳以前試過啦! 過來讓媽媽抱抱,做番好朋友!"

轉過頭. 小猴子又站在沙發靠背上媽媽前媽媽後的. 尤幸這次見到媽媽不滿的神色, 猴子總算有點醒覺: "不要站在這裏, 要坐下來."

這頓飯總算有點收獲.

奉獻

下午從教會回家路上, 行行邊把手伸進口袋裏, 邊說: "媽媽, 我的奉獻錢還在這裏."
"咦? 今天沒有收奉獻嗎? 哥哥姐姐們有沒有出去奉獻呢?"
"有啊, 但我等了很久, 都沒有出去." (老師說過太小的孩子如沒有特別交帶, 通常不會預算他們會出去排隊奉獻.)
"那行行有沒有告訴老師妳準備了奉獻錢, 想奉獻呢?"
"我有跟老師說啊, 但老師聽不到."
"是嗎? 不要緊, 也許老師太忙, 也許行行聲量太小, 所以老師聽不到..."
"是不是我說得不清楚呢?" 行行低頭一臉鬱悶地問. 這可是行行素來說的話中,聽得媽媽最心疼的. 一時媽媽只想把妳摟入懷裏
"我想不會吧? 你再說一遍對老師說的話給媽媽聽聽?" (媽媽當然知道行行發音咬字確實不很清楚, 不相熟的人聽來確實有困難)
" '老師, 我想 foh-6 li-3 (奉獻), 我有foh-6 li-3 di-2 (奉獻錢).' 清唔清楚呀?"
"唔, 兩歲十個月的小朋友這樣說應該都算清楚的, 不過妳可以再跟媽媽說幾遍. '奉--獻--' "
" 'foh-6 li-3' " (行行, 媽媽知道妳已經很留心很努力模仿了)
" '奉--獻--' "
" 'foh-6 li-3' "
"說得不錯啦行行. 下次跟老師說時, 還可以拿著奉獻錢來說, 老師應該很明白的了."
(聽到行行努力模仿媽媽發音但仍未能依樣做到時那句: "我講唔到喎!", 妳知道媽媽多心疼嗎? 但妳的努力, 媽媽真是非常欣賞啊!! 媽媽永遠也會支持妳到底!)

童言....無忌

去姑丈姑媽家食飯. 飯後姑丈拿行行來捉狹.

"行行你看我肚裏有個BB呢." 頂著個小肚腩的姑丈說.
"行行, 男孩子肚裏可以有BB嗎?" 行行媽問行行.
"不可以. 姑丈, 男孩子肚裏不會有BB."
"那姑丈肚裏是甚麼呢行行? 是肥..." 行行媽乘機要取笑姑丈.
"是肥肚腩!!!!" 行行搶著高聲答. 大家一哄而笑.
"哈! 行行真聰明, 怎麼知道那是肥肚腩呢?" 大家問.
"因為我媽咪都有一個肥肚腩吖嘛!!" 行行想也不用想, 得意地高聲搶答.

當著眾人, 瘀得我!!!

為食妹

"媽咪, 我想食糖! 食完糖我會刷牙, 用牙膏刷!" 行行指著內放各式零食的零食袋, 跟媽媽講數.

"吓? 咁夜食糖唔係幾好. 食第二D都話可以諗吓啫."

"咁你比我食 "第D" 吖. 我想食 "第D" 呀." (行行以為 "第D" 是新種零食. 媽媽忍不住爆笑.)

"哈哈哈!! '第D' 唔係食物嚟架, '第D' 係 '其他'咁解, 媽咪係講 '其他食物' 呀."

"咁你比我食 "其他" 啦, "其他" 好毋味架? 我想食 "其他" 喎. 食完 "其他" 我會用牙膏刷牙....."

xxxxxxxxxxxxxxxxxxxxxxxxxxxxxxxxxxxxxxxxxxxxxxx

行行少吃零食. 零食中糖果之類, 尤其少給, 但不會嚴禁. 通常出外不時都會有人給行行三兩粒糖果, 尤其學校生日/聯歡會, 尤其教會主日學, 尤其街上的婆婆嬸嬸姨姨. 既是對方一番美意, 除非行行咳, 否則媽媽不會嚴禁謝絕, 只要求行行收下後, 要先交媽媽驗證, 才決定是否放入零食庫, 然後才(慢慢)決定是否/何時給行行吃-----所以零食庫內的糖果已經越存越多.

許是這原故, 行行真係好 "為食"!

唔駛驚!

清晨窗外忽然响起: doo---doo----doo---, 應該是甚麼車在倒車吧.
行行朝媽媽說: 你唔駛驚, 過嚟我攬住你吖! (吓? 乜你覺得我驚咩?)

傍晚時隔著天花板傳來: dung---dung----dung-----, 應該是樓上哪人家在搬箱倒槓吧.
行行朝媽媽說: 你唔駛驚, 過嚟我攬住你吖! (吓? 乜你覺得我驚咩?)

晚上看故事講到大壞蛋出場,
行行朝媽媽說: 你唔駛驚, 過嚟我攬住你吖! (吓? 乜你覺得我驚咩?)

xxxxxxxxxxxxx
唔驚唔驚, 有妳在媽媽就乜都唔驚.......又或者, 就算驚, 都可以頂-------硬--------上-----------!!!

看戲

第一次帶行行上戲院. 看的是 "秋田犬八千", 選這戲, 是因為:

1. 有狗狗看
2. 片長只個半鐘
3. (最重要)已是水尾, 偌大的戲院 (我選了黃埔嘉禾, 少有的大場)只有二三十人入場, 我買的雖然是最正中的位置, 但即使行行中途耐不住, 仍可以伺機走位, 為所欲為.

可喜的是, 頭一次去戲院, 燈一關, 行行不但不怕, 還萬二分期待開場. 一開場, 就一直自己坐著專心靜靜的看.

然而可惜的是, 沒想到行行非常投入這齣大苦情戲. 之前知道是知道這戲是會叫人哭的, 但一心以為行行未必看得懂 (加上又是英語對白), 反正有狗狗讓她看就是了.

誰知, 看到中途, Richard Gere飾演的Parker在課堂上心脏病發倒地後第一個傍晚, 狗狗Hachi在火車站等不到主人回來, 行行已開始一面抽泣, 一面低聲說: 媽咪, 抹眼淚...(要拿紙巾) 行行問: 媽咪, 叔叔呢?叔叔去左邊度? 我說: 叔叔病左, 入左醫院. 行行就問: 然後呢? 然後呢? 我說: 然後佢病得太嚴重, 天父唔想佢太辛苦, 接左佢返去天家, 有天父陪住佢 (自己懶醒唔想講個 "死" 字, 但其實之後就知笨.) .

到多年後女主人懷念亡夫故地重遊回到家鄉火車站, 見到Hachi仍在痴痴地等主人那一幕催淚戲, 行行更是一發不可收拾, 一面大哭, 一面指著銀幕高聲喊著: 叔叔不回來啦, 叔叔死左啦.....那刻已經太遲, 要抱行行走呢, 她又更不肯. 唯有摟著她......

幸好電影最後交代風雪夜裏在火車站外沉沉睡去的Hachi, 竟在夢中跟主人在樂土重逢, 像昔日那樣一起玩一起跑一起跳, 行行才又破涕為笑.

xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx

行行, 因為媽媽大意, 就給妳留下了這傷感的 "第一次". 但幸好, 在妳最傷心的時候, 爸爸媽媽都在妳身邊, 可以摟著妳給妳抹眼淚.
以後, 真不可以低估了妳, 因為妳雖然小, 但已經是有自己思想感情的人仔了.