人肉錄音機

為行行當 "陪瞓" 專員.

"我開CD比你聽..." (那首催眠曲 "Wo Yi Daogao" (註: 原歌名為 "我以禱告來到祢跟前"; 行行管叫它 "Wo Yi Daogao ")--加上另外一首催眠曲--由行行幾個月大就一直用到現在)

"我唔要!"

"你唔要聽歌?"

"我唔要 'Wo Yi Daogao '."

"咁要乜野?"

"我要 'Ku Mau Cinta Yesus Selamanya'." (雖然咬字唔正,但知行行講乜, 阿媽真係眼都大埋)

xxxxxxxxxxxxxxxxxxxxxxxxxxxxxx

事緣, 前晚行行扭計不肯在房裏睡, 要媽媽抱著在客廰梳化睡, 沒有CD機, 行行媽就隨口唱自己中意的歌, 第一同第二句歌詞就係 "Ku Mau Cinta Yesus Selamanya". 雖然向來無乜唱呢首歌比行行聽, 但可能已經扭到攰, 唱兩唱, 行行已經睡著.
琴晚, 行行如常在房睡. 按前一晚經驗, 行行媽懷疑首歌有安神作用, 食髓知味, 又再重施故技, 唔開CD, 清唱返首印尼文歌. 原來行行中意喎, 好快, 又瞓著.
但估唔到, 今晚, 佢已經識自己 "點唱" .

你話呢?

坐的士時言談間跟司機提起上星期手提電話遺失了, 所以沒有電話用, 行行便又來 "每事問" 了.
"媽咪你個電話呢?"
"唔見咗囉."
"咁你個電話喺邊度呀?"
"喺科學園跌左囉." (繼續答)
"咁個電話喺邊度呀?"
"可能比人執咗囉." (繼續忍耐)
"咁執咗喺邊度呀?"
"可能果個人貪心, 攞咗去賣囉." (再忍耐, 但夠未呢? 阿媽就係因為太攰太唔舒服, 才帶著你搭百幾蚊的士返屋企呀, 細路!)
"仲可能呢?" (你仲想點呀?? 我無氣啦! 一於還擊...)
"咁你話呢?"
"可能佢擺咗去屋企囉." (有道理喎, 細路!)
"咁仲可能呢?"
"仲可能比人掃咗去垃圾桶囉." (又的確係喎!!)
"咁仲可能呢?"
"可能個電話自己返嚟囉, hea-hea-hea." (哦? 咁都得?? 細路你真係樂觀喎!)
(到此, 阿媽煩氣一掃清, 精神為之一振, 又再認真投入親子對話)
"係喎, 咁我地睇吓個電話會唔會自己返嚟吖!"
(下刪親子對話三萬字 = 約半個鐘車程)

xxxxxxxxxxxxxxxxxxxxxxxxxxxxxxxxxxxxxxxxxxxxxx

常道兩歲多是每事問問問問問問問...........問到你煩的年齡, 又道阿爸阿媽即使幾煩都要答答答答答答答............答到佢滿意為止.
卻原來, 每事打爛沙盆問到督的煩小孩, 腦子裏也許已經滿載古靈精怪的點子, 你答極都答唔中佢諗緊果D野, 梗係一直問到你答中為止.
其實拆解方法好簡單: 比佢講! "你話呢?" "點解呢?" "你講比我聽啦?"......先下手為強!!